CLICK HERE FOR THOUSANDS OF FREE BLOGGER TEMPLATES »

Sunday 14 November 2010

قلتلكم هحكى عن رحلة العمرة
كان عندى21 سنة
وسافرت بحرى
سفينة السلام بس الصراحة مش متذكر 96 ولا السلام 98المهم سافرت يوم جمعة خرجت من بيتى الساعة 9 الصبح ركبت العبارة الساعة 11 الصبح وقعدت لحد الساعة خمسة بعد العصر لحد ماخرجت العبارة من مينا السويس متجهة للاراضى المقدسة فاكر انى السفينة كانت مشغلة سورة البقرة كاملة وكانت شغالة فى سماعة الاوضة المهم قعدنا يومين فى العبارة لحد ماوصلنا مينا جدة الساعة 9 الصبح واخدنا شنطنا ونزلنا المينا وعلى ماخلصنا الاجراءات وكدة ركبنا الاتوبيس على الساعة 1 الضهر او 2 فى الحدود دى وصلنا المدينة المنورة الساعة 8 بالليل ودخلنا الفندق وكان العشا بيدن وطبعا ملحقناش نصلى العشا فى المسجد النبوىطلعت اوضتى طبعا غيرنا واتشطفنا من السفر وفتحت شباك اوضتى ولاقيت مآذن المسجد النبوى قصادى قعدت املى عينى منهاونمتوصحيت على الادان الاول للفجروكانت دى اول زيارة ليا لمسجد سيدنا النبى اول مادخلت كنت بقدم رجل واخر رجل مش عارف ليه لاقيت مكتوب قصادى على كولمانات كبيرة ماء زمزموانا عارف ان ماء زمزم لما شرب ليه فقلت عايز ادعى دعاءقبل مااشرب ماء زمزم فجه على بالى دعاء بحبه اوى اللى هوربى اوزعنى ان اشكر نعمتك التى انعمت على وعلى والدى وان اعمل صالحا ترضاه وادخلنى برحمتك فى عبادك الصالحين قعدت مابين الادان الاول والادان التانى ادعى ربنا كتير اوىلحد ماقامت الصلاةوصليت ورحت ازور سيدنا النبى لحد ماجيت سالت عسكرى بقله لو سمحت هى فين الروضة فقاللى حضرتك فى الروضة ورحت سلمت على سيدناالنبى وصليت عليه وسلمت على سيدنا عمر وسيدنا ابو بكر مش عارف ليه وقتها عيطوحبيت ارجع من الباب اللى خرجت منه معرفتش من الزحمة فخرجت من باب القبة الخضرا فلاقيت نفسى تايه ودى كانت اول مرة اتوه فيها قعدت ماشى ومش عارف انا رايح فين ولاجل الحظ انى الفندق كنت معلمه بمحل اسمه حامل المسك لما لاقيته عرفت اوصل للفندق فى نفس اليوم قمت الليل وصليت صلاة التسابيح وحصل موقف لن انساه طول عمرى وانا ساجد شفت نور شديد فقمت خرجت من الصلاة مش خوف اد ماهو كان استغراب وفى اليوم ده مر عادى وكنت دايما اقعد من بعد صلاة العصر لحد صلاة المغرب واروح اكل وارجع اقعد من بعد المغرب لحد العشا وفى الفجر برضه كنت اروح المسجد اقعد من بعد الفجر لحد الضحى فى يوم كنت قاعد ارتل قرآنوجه واحد مش عارف اندونيسى او باكستانى وجه قعد جنبى فسكت فشاورلى كمل وسالنى بلغته مفهمتش منه حاجة بس اللى قدرت افهمه انه كان معجب بصوتى فى اليوم التالت كانت زيارة لمسجد قباء ومسجد القبلتين وجبل احدطرائف المدينة كنت رايح اشترى سواكوكانت مجموعات كدة فقعدت كل شوية اشم ريحة سواك واشوف غيره قعدت كتير فالراجل تقريبا زهق منى فقالى هو انت بتشم مخدرات موقف تانى كنت بتمشى بعد العشا لوحدى فى المدينة وكنت بعلم الطرق اللى جيت منها عشان متوهش المهم دخلت محل بيبيع هدوم الصراحة الهدوم فى السعودية مش حلوة خالص فقعدت اساله عن الاتمان المهم سبته ومشيت راح قعد يقول بصوت عالى مش بايع لمصريين يجو يبصو على الحاجة وفى الاخر ميشتروش قمت باصصله ومشيت على فكرة سبحان الله رغم الكل هناك بيلبس عبايات بيضة بس انا لما كنت اشوف مصرى اعرفه انه مصرى حتىمن غير مايتكلم لاقيت ان احنا لينا طابع خاص متحسوش غير لما تبقى فى وسط اغراب
غرائب المدينة
كان مكتوب على حيطة الفندق على هو الله تقريبا الشيعة هما اللى كانو كاتبينها
مواقف المدينة
انا كنت فى العمرة انا ووالدتى وخلانى كلهم بزوجاتهم وعمتى وجوزها وزميل خلانى فكنا متفقين اننا بعد صلاة العشا هنتجمع قصاد الباب الرئيسى اللى هو جنب الروضة واتجمعنا ورحت لاقتهم كلهم واقفين فقلتلهم متجمعين عند النبى لاقيت ناس دمعتوبعد كدة رحنا مكة المكرمة وخرجنا تقريبا بعد صلاة الضهر وودعت المدينة وانا ابكىلما قربنا على الحرم ودخلنا مكة كان ناس كتير فى الاتوبيس بتبكىوكنا بنقول لبيك اللهم لبيكالحقيقة كان اول مرة احس بمعناها وبكيتكنت حاسس انى ربنا بيقلى انا دعيتك يامدحت تزور بيتى وانا بقله وانا جايلك من مصر بسرعة يارب لبيك اللهم لبيكلبيك لا شريك لك لبيك لاشريك لك حسيتهاعارفين انتم مخلصين له الدين لا اله الا الله لامعبود بحق الا الله لانعبد سواه وهو الواحد الذى ندعوه ونناجيه ونرجوه ونتقوى به ونتوكل عليه ونخشع بين يديه ونستعين به ونحبه ونهابه ولانطمع الا فى كرمه احساس جميل اوى لما تحس انك ليك رب انا كنت عارف انى لما تدخل الكعبة وتشوفها لاول مرة انك ليك دعاء مستجاب اول ماتشوف الكعبة فقلت اول ماهشوف الكعبه هدعى دخلنا من باب اسمه باب السلام واول مادخلت مدعتش تخيلواقعدت ابكى وطوفنا حوالين الكعبة وسعينا وكنت فرحان اوىوكان فيه واحد افغانى عمال يزقنى بطريقة رخمة بس كنت مبسوط والله برضه وخرجنا من على الساعة 3 وانا خارج برضه من باب تانى غير اللى دخلته وتهت لتانى مرة لحد ماسالت على اسم الفندق واحد وصفهولى ونمت اللى فاكره فى مكة اوى انى دعيت ربنا وقلت يارب الهمنى عمل فى الحرم كبير جدا يخليك تحبنى فلاقيت راجل كبير مصرى نده عليا وقاللى ممكن تجبلى اشرب ورحت جبتله وسقيته مش اى ماية دى ماية زمزم وقعد يدعيلى ولاقيت واحد كان نازل على السلم وكان هيقع قمت مسكته وراح قعد يدعيلى جامد اوى ويوم تانى كان بعد صلاة الفجر ناس بتملى من الحنفيات وانا كنت رايح املى فلاقيت راجل كبير جدا عجوز اوى وشايل الزمزمية اللى بيملاها بالعافية قمت اخدتها منه ومليتهاله وبرضه قعد يدعيلى والله فحسيت اد ربنا بيحب الانسان اللى بيساعد الناس
طرائف مكة
كنا خارجين من المسجد بعد صلاة العصروكنا معديين على محلات قلاقينا واحد سعودى بينادى مصريين مصريين فول وفلافل راح خالى قاله ياعم احنا زهقانين منهم فى مصر نيجى نلاقيهم هنا
مواقف فى السعودية تلاقى تلاجات بيبس موجودة فى الشوارع تحط العملة ينزلك كانزالحقيقة انا قلت لو فى مصر دى كانت تبقى مليانة كازوز على عينها مكان العملة وتلاقى مكتوب عليها احمد بيحب منى ومرسوم عليها قلب المهم زميل خالى جاب كانز وحاطه جنب حيطة وهى مقفولة طبعا ورحنا صلينا العشا واحنا راجعين بعد الصلاة بوقت طويل لاقيناها مكانها وخدها وشربها فى اخر يوم فى مكة كان صلاة فجر وبعدها هنصحى الصبح نسافر فوانا بصلى الفجر فى الركعة التانية والله جالى هاتف وانا ساجد قلت انا هشوف اخر اية هيقلها الشيخ فى الصلاة وهحطها حلقة فى ودنى طول عمرىفكانت اخر اية سمعتها هىان الدين عند الله الاسلام بس وركبنا السفينة على الساعة خمسة وكان المنظر بتاع البحر يرعب كان الموج عالى اوى وحسيت انى السفينة هتغرق حتى والدتى رغم انها كانت تعبانة خافت تنام المنظر كان مرعب للغاية وربنا يتقبل ويكتبهالنا كلنا للى راحها يروحها تانى واللى مرحهاش ربنا يكتبهاله

لعبة الشطرنج


اشعر انى حين احبك كأننى العب لعبة الشطرنج
فكلما حركت شعورا من مشاعرى تجاهك قتلتيه
ولم يتبقى لى الا ملك هذه المشاعر الا وهو قلبى
فهل لك ان تتركيه ؟

Monday 28 June 2010

مملكة الاوهام

لوعندك حلم وعايز ؟؟؟ وعايز تفسره اتصل برقم ............

اخص

انا لما قريت الكتابة دى افتكرت هيقولو لو عندك حلم وعايز تحققه اتصل برقم .....
مش تفسره اتصل برقم ...!!!!!

هو احنا هنعيش فى الاحلام دى لحد امتى

المهم
بمناسبة تفسير الاحلام

اتصلت متصلة بالشيخ اياه يفسرلها حلمها

بتقله ياشيخ انا شفت فى الحلم الرئيس محمد حسنى مبارك

شوف بقى تعليق الشيخ

طول الوقت يقول ماشاء الله .. ماشاء الله
الله اكبر ... الله ... الله

كانها شافت النبى

تفسير الشيخ بقى

مبارك يابنتى من البركة حياتك كلها بركة عشان شفتى الريس مبارك

وناقص يقلها هتدخلى الجنة عشان شفتى الريس

اه ياولاد ال....

المهم

فى النهاية اللهم بحرمة شهر رجب

حرم جسدنا على النار

وصلى اللهم على سيدنا محمد واله وصحبه وسلم

Tuesday 8 June 2010

خسرانة خسرانة

كنت بتفرج النهاردة على برنامج خالد الغندور
وكان خالد بيحتفل بفوز حرس الحدود على الاهلى وحصوله على كاس مصر وده شىء جميل

اللى فقعنى فى البرنامج التقرير اللى عمله واحد بصراحة مش عارف ده ملته ايه
لا وكمان اللى قرا التعليق واللى راجع التعليق

لاقيته بيقول فى التقرير
طبعا لان حرس الحدود مؤسسة عسكرية كان طبيعى يفوز بكاس مصر وده مصداقا لقوله تعالى فى كتابه العزيز اذا دخلتم مصر اتخذو منها جنودا كثيرة

اولا ايه علاقة فوز الحرس بالكلام ده
ثانيا
الكلام ده مش قرءان ومش موجود فى المصحف
ده حديث شريف

انا اكتر حاجة اكرهها لما الجهل يكون نابع من اعلام الكل بيصدقه

عموما
ضربو الاعمى على عينيه قال هى خسرانة خسرانة



Sunday 24 January 2010

قصة منتحرة

هى فى جمالها تاهت
وفتنت كيفما شاءت
مذاقا حلوها مرا

وعلمت انها تفنى

وهويت حينها عميت
بواخر عشقها ركبت
تصادق موج اهواء
وسارت حينها غرقت

واول عشقها خدعت
وخرجت من حبها صرخت
بأن الطعنة قد قتلت
وصدقت حينها كذبت
وصارت قصة اخرى
لتهوى مرة اخرى
فهى عن حبها بحثت
وماانتهيت

لذا بكيت

ولكن بعدما فسدت
لان الوردة قد قطفت
وماتت بعدما انتزعت

وكل من تراه الان تحكى له
كيفما ذبحت

وان الجرح ابكاها
وان الروح قد نزفت

وتستعطف مشاعره
وتنتظر مواساته
لذا حكيت

والف قصيدة كتبت
لتحكى انها ظلمت

وتدخل قصة اخرى

لتثبت انها انتصرت

وقد فشلت

لان مشاعر ماتت وماانتفضت
فكيف الان تشكين
وتروين
قصة انتحرت

Friday 15 January 2010

الجنة مش الجنة

حد يعرف الجنة اللى اللى كان عايش فيها سيدنا آدم كانت فين
اكيد كلنا بنقول انها كانت فى السما
وطبعا رد مش سليم
لان الجنة اللى عاش فيها سيدنا آدم
كانت فى الارض
تعالو نسمع كدة الشيخ الشعراوى قال ايه
قال ان الجنة اللى دخلها سيدنا آدم كانت فى الارض
والدليل على كدة
ربنا قال فى سورة البقرة
واذ قال ربك للملائكة انى جاعل فى الارض خليفة
اذن آدم مخلوق من الارض فى الارض
طيب امال ايه الجنة اللى كان فيها سيدنا آدم دى
قال الشيخ تعريف جنة
جنة تعنى بستان
وده معناها فى اللغة
ربنا قال على لسان انسان صالح فى القرءان لانسان عاصى فى سورة الكهف
ولولا اذ دخلت جنتك قلت ماشاء الله لاقوة الا بالله
معناها فى الاية
انى لما دخلت بستانك
قلت ماشاء الله لاقوة الا بالله
الدليل التالت
ان سيدنا آدم الجنة الى دخلها مكانتش جنة الخلد
لان جنة الخلد محدش بيخرج منها
ومفيهاش حاجة محرمة
ربنا حرم عليه شجرة واحدة
الجنة مفيهاش حاجة حرام
فى ناس تقول
ربنا قال
وقلنا اهبطو منها بعضكم لبعض عدو
ده دليل انهم كانو فى السما
مش فى الارض
نقول ان الهبوط نوعين
هبوط مكان وهبوط مكانة
الهبوط اللى هبطه سيدنا ادم هبوط مكانة
زى الهبوط اللى هبطه بنى اسرائيل كدة
ربنا قال لبنى اسرائيل فى القرءان
اهبطو مصر فان لكم ماسالتم
الهبوط كان هبوط مكانة
لما اليهود دخلو مصر الفراعنة ذلوهم
رغم انهم كانو عايشين فى عيشة رغدة
سيدنا ادم برضه كان عايش فى عيشة رغدة
مكانش بيجوع ولا بيعطش ولابيمرض ولابيعرى
ربنا قال لسيدنا ادم والسيدة حوا
فكلا منها رغدا حيث شئتما ولاتقربا هذه الشجرة
الاكل مكانش عن جوع
كان عن رغد كانو متنعمين
لما هبطو عاشو فى ذل
دليل ان المعصية تورث الذل
يمكن سيدنا ادم لما كل من الشجرة اللى حرمها ربنا
بانت شخصية الانسان فيه
ان الانسان بطبعه عاصى
وده اللى قاله االرسول
صلى الله عليه وسلم
كل ابن آدم خطاء
وخير الخطائين التوابين
دليل كمان ان الانسان بيكره الموت
سيدنا آدم كل من الشجرة لانه كان كاره انه يموت
الشيطان قال له
وذكرها الرحمن
االا ادلك على شجرة الخلد وملك لايبلى
كمان الانسان طماع
وعقله قاصر
وبيندم
وعنده احاسيس
مش عايز اطول اكتر من كدة
سلام عليكم

Friday 8 January 2010

مش كره فيه

وآدى قلبى اللى اتجرح من يوم ماسبتى
حالف ليمسح من قاموسه يقول حبيبتى
لاى واحدة لانه عارف انه حبه كبير عليها
ولانه حاسس انه ايدها غير عينيها
فى عينها حب وايدها سكينة ماشية بيها
ولانه متاكد وعارف ان الحب الكل بيدور عليه
ومن النهاردة كل اللى هيقرب لحبى مش هيلاقيه
الجرح كان اكبر كتير من اى جرح
الجرح اكتر من سنة ولسة جوة القلب شرخ
وانا لو هعيش العمر علشان اعطف عليه او اداويه
مش هلاقى حل
اصل الخيانة كفيلة ان تهد تل
انا كل لما امر على اسماء اميلى والاقى اسمك
احس انى لسة جوة قلبى جرحك
وبحاول اقنع نفسى انى خلاص مسامحك
رغم انك انتى سبتى قلبى يتحرق وسط الاهات
قلبى اللى اللى سهر علشانك بالساعات
تعب ومات
لما تشوف حد فى عينيك ملاك وبس
فجأة تلاقيه شيطان ولايمكن يحس
كل اللى بقوله عليه
مش كره فيه
لكن بطبطب على قلبى اللى حن فى يوم اليه
وبوعده
لا الحب ليه فى يوم دعوة بينا
ولا احنا لينا دعوة بيه

Wednesday 6 January 2010

رسالة الى كلا من

شيخ الازهر


انت تخرس خالص

ـــــــــــــــــــــــــــــــــــ

عمرو خالد

كل مشروع بتعمله بحس انه مشروع فاشل وعلى العموم بتمنالك النجاح

_________________________________________________

بطرس غالى

ده قانون يابن ال ........

ـــــــــــــــــــــــــــــــــــــــــــــــــــــــــــــــــــــــــــــــــ

عادل امام

بقيت تهتم فى افلامك باثارة الناس جنسيا اكتر من اهتمامك بانك تضحكهم وتشيل عنهم همومهم

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

وزير البترول

عمال البترول بيدعولك

ـــــــــــــــــــــــــــــــــــــــــــــــــــــــــــــــــــــــــــــــــــــــــ

عبد الناصر مصطفى

(( نائب السويس )) ساعة الانتخابات كان كاتب على اليفط الاعلانية انه نازل مستقل ومش هينضم لحزب الحكومة والناس انتخبته على هذا الاساس ومفاتش اسبوعين على نجاحه ولقيناه انضم للحزب الوطنى
بقله اخص
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

حسن نصر الله

الحكومة لعبت فى صورتك بالفوتو شوب وحولتك من زعيم لاارهابى

فى عين الشعب المصرى

بقلك انت لسة زعيم

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

محمد على ابراهيم

هو انت ليه فى كل مقال تكتبه لازم تكتب فيه الجملة دى
(( حكمة الرئيس مبارك ))

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

زكريا بطرس

حاسس ان طريقة موتك هتبقى علامة من علامات يوم القيامة

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

فتحى سرور

هى رجللك موجعتكش من القعدة

__________________________________


فاروق حسنى

تعتقد خسارتك فى اليونسكو غضب من ربنا ولا مجرد ابتلاء

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

محافظ السويس

بتمنى استمرارك كمحافظ للسويس