CLICK HERE FOR THOUSANDS OF FREE BLOGGER TEMPLATES »

Saturday, 22 August 2009

ماعلينا

اولا كل سنة وانتم طيبين ورمضان كريم على الامة الاسلامية ويارب يكون اخر رمضان يمر علينا والامة فى حالة انهزام وانكسار
ثانيا ببارك لان ابتداء من النهاردة الحمد لله فتحت ابواب الجنة واغلقت ابواب النار وصفدت الشياطين
بس للاسف الشياطين شياطين صح ولاد ستين فى سبعين
عملو ايه اللؤمة دول
ظبطونا قبل مايتسلسلوا باربعة واربعين مسلسل

يعنى لو اعتبرنا ان المسلسل مدته ساعة فرضا محتاج حضرتك اربعة واربعين ساعة فى اربعة وعشرين ساعة تتفرج على مسلسلات
مش موضوعنا
المهم
انا النهاردة كنت حابب اتكلم عن شوية حاجات كدة مطلعة عينى وغيظانى
اولا السلام عليكم
لما حد يقول لحد السلام عليكم الطبيعى يرد السلام
كنت طالع ميكروباص فى القاهرة واول مادخلت قلت السلام عليكم محدش رد قمت كررت السلام مرة تانية برضه محدش رد عليا قمت قلت لتالت مرة السلام عليكم وللاسف برضه محدش رد ولا حد بص من اساسه
الصراحة قعدت فى الميكروباص بغلى وقلت فى نفسى الشعب اللى يكسل انه يرد السلام
من المستحيل انه فى يوم من الايام نشوفه شعب متقدم ومتحضر وقلت الشعب اللى مينشرش السلام بينه وبين نفسه
من المستحيل برضه انه ينال السلام من خارجه
وعليه قررت انا العبد لله نشر السلام حتى لو محدش ردعليا السلام
والسلام عليكم ورحمة الله وبركاته
استظراف بقى
ابن خالة والدى بيقلى اتجوزت ولا لسة قلتله لسة والله
فقالى انت كام سنة قلتله 26 وهكمل سبعة وعشرين على نص 11 ان شاء الله
قاللى يدوبك تكمل عليهم وتجيب بيهم جزمة
الصراحة كنت عايز اضربه بالجزمة بس لانه راجل كبير بس
سكت
المواقف المحرجة السنة دى ليا
يمكن اول موقف كنت فى محل زميلىوبقله المسيحيين كترو اوى فى البلد يااخى
ومكنتش واخد بالى انى فى ست مسيحية واقفة ورايا
ماعلينا
الموقف التانى
كنت فى مصيف وانان الصراحة مبعرفش اعوم
وعملت عنترة ودخلت فى الغويط
المهم المية عليت
وواحدة ست بتقلى تعالى خد ولادىواصلا انان يدوبك المية قربت على رقابتى
وعمالة تعلى قمت سبتها ومشيت
حركة ندالة ندالة يعنى
بس اعمل ايه اموت نفسى يعنى
السنة دى بقى فى التلفزيون حصلت حاجات تجيب الضغط
اول حاجة
قناة الناس
الدكتور صفوت حجازى ست اتصلت بيه فبتقوله ياشيخ اكل الرز المحروق فى قعر الحلة الحكاكة اكلها حرام ولاحلال
اعتقد لو الشيخ كان صايم كان زمانته فطر عليها
فى قناة الحياة
برنامج الحياة اليوم
كان بيناقش الفيلم الامريكى اللى وصفو فيه السادات بالكلب
المهم واحد اتصل من المشاهدين بيقول للمذيع افضل اتنين حكمو مصر انور السادات ومحمد على وبس
جه يكمل كلامه راح المذيع قاطعو وقالو نشكر المتصل معلش مفيش وقت فى البرنامج
المتصل اللى بعديه قعد يشكر فى السادات وقام اتكلم حلوعلى الريس الكبير تقريبا اكتر من عشر دقايق
تقريبا مدو البرنامج بعدها ولا ايه
المتسولين
ليهم مواقف معايا السنة دى لاتعد ولاتحصى
اول موقف كنت فى منطقة السيدة زينب
ومعايا زميلى زيدان
المهم نادت علينا وقالتنا
لو سمحت ياكابتن انا معايشش فلوس اركب وعايزة بس اى حاجة عشان اوصل لبيتى المهم ادناها اللى فيه النصيب
ومشينا واحنا ماشييين بنبص لاقيناها راكبة تاكسى
يعنى ماعلينا برضه
واحد كل لما اروح الشغل اعدى عليه يوميا
بيشحت على الموقف
مرة ببص عليه برضه لاقيته واقف فى جنينة وعمال يشرب سجاير طب بالله عليكم واحد محتاج للقمة عيش بالشكل ده يشرب سجاير
وماعلينا
كنت راجع من القاهرة فى ميكروباص و اتنين عساكر جيش عمالين يقولو للسواق افتحلنا التكييف المهم فتحه ودول
يقولو ولا اكن التكييف شغال ولاجايب اى هوا فببص عليهم كدة لاقتهم قافلين التكييف اصلا
جيشنا لسة بخير ياجماعة
المهم رمضان كريم وكل سنة والمسلمين بخير وسعادة وعلى خطى الحبيب صلى الله عليه واله وصحبه وسلم

22 comments:

رحــــيـل said...

كل سنه وانت طيب رومضاااااااان كريم ويارب تكون بخير دايما

زهور الامل said...

هههههههههههههه
كل واحد فينا بيحصله مواقف محرجة بالهبل
طول الوقت مواقف مواقف
يعني انا من يومين كنت راجعة من الشغل الساعة اتنين الضهر وكنت واقفة في جديلة ومفيش ولا تاكسي رضي يوقف
فقررت اني اتنازل واركب ميكروباص
فجه الميكروباص كان عليه زحمة موت بس من حسن حظي وقف قدامي جيت اركب بسرعة فردة الشوز وقعت من رجلي تحت الميكروباص بعد ماركبت
وكنتت لسة جايباه جديد وغالي اوي ولسة مفرحتش فيه
اضطريت تاااااااني انزل من الميكروباص لاكمل رحلة العذاب في انتظار ميكروباص تاني

ركبت الميكروباص وكانه علبه سردين واحد قاعد قدامي فيه وبيتكلم مع مراته فوقت لقيت ايده لزقة في وشي
الدمعة كانت هتفر من عيني وحسيت ان عيني اتخلعت
والراجل فضل يعتذرلي قولتله ولا يهمك هو يوم كله ملخبط من اوله متشغلش بالك

كل عام وانت بخير ورمضان كريم

تحياتي

ليس فقيرا من يحب said...

السلام عليكم

متدقش كتير ياما هتقابل

كل سنه وحضرتك طيب يارب

رمضان كريم

norahaty said...

السلام عليكم ورحمة
الله تعالى وبركاته
حمداً لله على السلامة
ورمضــــــان كريم
اقولهم على السريع
وبعد لما أجى من الشغل
بأذن الله أكمل
السلام عليكم .

ريمان said...

ههههههههههههههههههههه


ههههههههههه


لا مش عارفه قاولك ايه

انا بجد هموتا من الضحك من الست اللى بتسال الشيخ صفوت عن حكا اكل الحكاكه


هههههههههههههه


حرام ولا حلال

بس بجد الشيخ قالها ايه


هههههههههههههه

ست عقلها مهييس اوى


كل سنه وانت طيب


رمضان كريم

kochia said...

كل سنة وانت طيب
ويارب يتقبل منك صالح الاعمال

تحياتي

عاشقة الأحزان said...

كل سنه وحضرتك طيب
ربنا يتقبل منا ومنكم صالح الاعمال
وجزاك الله كل الخير


رمضان كريم
مودتى
ايناس

سارة علي said...

كل سنة وانت طيب
ويا رب تكون بالف خير وترجع تدون زى حد كدة اسمة مدحت محمد بتاع زمان

تحياتى

مدحت محمد said...

رحيل

كل سنة وانتى طيبة يارحيل

مدحت محمد said...

زهور الامل

ايه الموقف الجميل ده

ده اكيد حد داعى عليكى


وكل سنة وانتى طيبة وتعيشى وتاخدى غيرها

مدحت محمد said...

ليس فقيرا من يحب

وعليكم السلام
وك سنة وانتى طيبة

وعلى رايك اللى يعيش ياما يشوف

مدحت محمد said...

نورهاتى
وحضرتك طيبة

مستنى بقالى فترة تعليقك لما نشوف

مدحت محمد said...

ريمان

كل سنة وانتى طيبة

فى ناس عندها الهوس هوس معلش يابنتى

مدحت محمد said...

كوشيا
وحضرتك بالف خير ويتقبل منا ومنك الصيام ان شاء الله

مدحت محمد said...

عاشقة الاحزان

وحضرتك بالف خير
نورتى المدونة

مدحت محمد said...

سارة على

اخيرا ظهر القمر

فينك من بدرى

نورتى المدونة بجد

yasmina said...

السلام عليكم
وبتقول مش عايز اتعبك ادينى قريته ومسيبتش كلمة فيه الا لما قريتها
هههههههههههههه
بس بصراحة مابطلتش ضحك
بس والله مش على حضرتك بس على المواقف ذات نفسها بجد حضرتك معبر عنها بطريقة حقيقى تجنن
وفى الاخر احب اقول يالا اللى يعيش ياما يشوف ويجرب حتى لو مواقف زى دى
كل سنة وحضرتك طيب
ورمضان كريم

نور الدين said...

حبيب قلبى ازيك ووحتنى جدا والله
كلامك رائع مش عارف اضحك ولا ازعل منه وبالنسبة لندالة العوم فباصديقى عيش ندل ولا تموت اسد ولا إيييييييه
اما عن البرامج وحرقة الدم فانا شخصيا قاطعتها وريحت دماغى
...
كل سنة وانت طيب ويارب تكون بكل خير
أخوك
.........
نورالدين محمود

ميرام said...

(:
(:
ابتســامة بجد
متابعة مدونتك من فترة
وللأسف مش بتنزل جديد شعر عامي
(:
كل سنة وانت طيب
تحيــــاتي

مدحت محمد said...

ياسمينا

اولا التعب مش من القراية وبس عارف عندك شغل تانى غير القراية
وعلى الموم الحمد لله انى البوست عجبك

وكل سنةوانتى طيبة

مدحت محمد said...

نور الدين

انت كمان واحشنى ووحشانى مدونتك معلش مقصر معاك

مش معاك بس مع الكل انا عارف

اما الهم اللى يضحك ده
وموضوع العوم ده الجرى نص الجدعنة معروف
ياللا كل سنة وانت طيب ياريس

مدحت محمد said...

ميرام


ميرسى ليكى
نورتى المدونة
وان شاء الله انزل جديد فى العامية

وكل سنة وانتى طيبة