CLICK HERE FOR THOUSANDS OF FREE BLOGGER TEMPLATES »

Sunday, 13 September 2009

البصيرة

مش عارف ابتدى منين واكتب ولا مكتبش
بس الحقيقة انا عايز احكى

الحكاية ابتدت معايا وانا عندى 16 سنة كنت فى تالتة ثانوى وكنت قريب من ربنا جداوالحمد لله كنت حافظ اجزاء كتير من القرءان
وكنت بصلى على طول فى المسجد
بس فى فترة تالتة ثانوى ابتديت اطلع على كتب للمستشرقين
المستشرقين دول ناس من الغرب بيدرسوا احوال العالم العربى ومنها ديانتهم اللى هى الاسلام
كان فى كتبهم بيهاجمو الاسلام والقرءان وبيقولوا ان القرءان فيه تناقض شديد وكانوا بيذكروا امثلة على ده من القرءان نفسه
والحقيقة من كتر قرايتى للكتب دى اتأثرت بيها جدا وحسيت انى فى كلامهم جزء من الحقيقة
بس ماقتنعتش بكلامهم تمام الاقتناع
فى الفترة دى كنت بتقطع من جوايا
هل انا على الدين الصح ولا دين المسيحية هو اللى صح
كنت واقف فى النص
لاعارف اكدب الاسلام ولاعارف اصدق المسيحية
لدرجة انى لما كنت بقرا القرءان كنت بحس انه مش كلام ربنا
وكنت حاسس زى مابيقولو ممكن يكون متألف ومنسوب لربنا
وكنت دايما اقول اناهدخل النار ولاهدخل الجنة
يعنى لو انا مسلم وكلام المستشرقين صح
يبقى انا فى النار
ولو الاسلام صح والقرءان فعلا منزل من عند الله
واتبعت المسيحية
يبقى انا كمان فى النار
وكنت دايما اقول فى نفسى
سيدنا عيسى احيا الموتى
وسيدنا موسى فلق البحر بعصاية
طيب اشمعنى سيدنا محمد مجاش بمعجزة كبيرة زى بقيت الرسل
هل فعلا زى مابيقول المستشرقين محمد ادعى انه نبى

قعدت فى حالة التفكير المستمر ده تلت سنين
لحد ماتوفى والدى
بقيت حاسس انى عايش فى جحيم هو والدى كدة داخل النار ولا داخل الجنة
هو مات على الاسلام وممكن الاسلام ميكونش هو الدين الصحيح
فضلت تايه بجد
ويوم تشييع والدى
اعمامى قالولى يامدحت ياللا اتوضى عشان انت اللى هتصلى بينا على ابوك
الصراحة اتخضيت
ورفضت لانى الصلاة اللى هصليها دى شاكك فيها
ورحنا دفنا والدى ومرضتش ادخل القبر ووقفت بعيد برة القبر خالص
وحتى لما دعو لبابا مأمنتش
و لما روحت
فضلت اسأل نفسى بابا كدة فى النار ولا فى الجنة
ودماغى حاسس انها هتنفجر
لحد ماوالدتى مسكت الشنطة بتاعت والدى وفتحتها وكان فيها حاجات خاصة بيه
فلاقيت مفكرة صغيرة قمت فتحتها
كانت المفكرة دى مكتوب عليها مفكرة
سنة 2002 وهى السنة اللى اتوفى فيها والدى
فلاقيته كاتب فى اليوم اللى عمتى اتصابت بيه بالسكر مدى حزنه عليها
ويوم تانى كاتب انه فى اليوم ده اتعرض عليه رشوة ورفضها

لكن اللى خلانى بكيت بكاء شديد جدا جدا ومقدرتش امسك نفسى من البكا
انه اخر جملة كتبها فى المفكرة
وهو اليوم اللى جاله فى غيبوبة الموت
كانت رد على سؤالى هل بابا كدة فى الجنة ولا فى النار
حسيت انه رد عليا فى اخر جملة كتبها فى حياته
ان شاء الله الجنة
انفجرت فى البكاء بطريقة مقدرتش امسك نفسى وكنت حاسس انى هموت من شدة البكا
وعلى فكرة مكنتش بكيت على بابا من اول مامات غير فى اللحظة دى
وكانت اول خطوة على الطريق الصح انى بطلت اسمع لكلام المستشرقين واسمع كتير جدا للشيخ الشعراوى وكذا شيخ برضه وكنت بتأثر بكلامهم جدا
وليا زميل اهدانى شريط للشيخ صلاح الجمل
كان دعاء ولما كنت اسمعه كنت ابكى بكاء شديد
وجبت كتاب السيرة النبوية للمباركفورى

يمكن فى الفترة دى معتقدش فى تكبيرة فاتتنى
وكان كل لبسى فى الفترة دى العبايات البيضة
واطلقت لحيتى كمان
وكان فيه حرب شعواء ضد تربية اللحية من نحية البيت عندى
رغم ان اللحية كانت لسة خفيفة
وفى الفترة دى حفظت كتير من القرءان
والحمد لله اطمئن قلبى جدا جدا للاسلام
والله فعلا انا حسيت انى مسلم فعلا
مش مسلم اسم كدة وخلاص
عن اقتناع تام
انى على الطريق الصح
بس الوصول ليه فعلا كان فى غاية الصعوبة
لحد ماوالدتى قالت انا عايزة اطلع عمرة
وكان لازم محرم اللى هو انا طبعا لانى الولد الوحيد ليها
كان ده اكبر كرم لربنا ليا طول حياتى
وان شاء الله احكى رحلة العمرة فى بوست تانى بأذن الله
ويارب ندخل الجنة
سلام عليكم

22 comments:

سلوى said...

فعلا في ناس مسلمه بالبطاقه
وفي ناس بتوصل للإسلام بعد مشقه
بتوصل له وتبقى مسلمه قلبا وقالبا
مش مجرد انه اتولد مسلم
فخلاص بقى مسلم
بس النوعيه اللي بتوصل للإسلام بعد بحث ومشقه
بيكون إسلام بجد

بحييك على جرأتك
وربنا يثبتك ويهديك للصواب دوما

dodoo said...

رضيت بالله رباً وبالاسلام ديناً وبمحمد صلى الله عليه وسلم نبيا ورسولاً

انت بعد اللى حصلك ده تقول الكلمات دى وانت مقتنع تمام الاقتناع مقتنع بدون ذرة شك واحده ان الاسلام هو دين الحق

الحمد لله اللى هداك للصح ولدينه

تحياتى

زهور الامل said...

تعرف انك كدة ايمانك واسلامك هو كدة الصح
لانه جه عن اقتناع بجد
والصعوبة في الوصول لشيء هي اللي بتخلينا نحافظ عليه مدى حياتنا
والحمد لله ان قلبك اطمئن للاسلام والايمان واتاكدت ان القران هو كلام ربنا عز وجل وان رسولنا عليه افضل الصلاة واتم التسليم هو خاتم الانبياء المرسلين

ربنا يقوي ايمانك
وتستمر دايما على الطريق الصحيح

تبنا الى الله ورجعنا الى الله وعزمنا عزما اكيداً على اننا لن نعود الى الذنوب والمعاصي ابدا وبرئنا من كل ذنب ومن كل دين يخالف دين الاسلام والايمان

تحياتي

yasmina said...

السلام عليكم
الموضوع بجد ميستحقش انه يتمسح والله
بس احب اقول لحضرتك حاجة انا كنت فى فترة كدةبس كنت بستغفر ربنا وبستعيذ من الشيطان
لغاية بصراحة قريت كتاب اسمه ارواح واشباح هو اسمه مخيف شوية بس فيه انيس منصور بيقول عن حاجات بيقول عليها حقيقية بجد وفيه باختصار حكاية راجل رجع وقال ايه اللى شافه بعد ما مات وهو ان الدين الاسلامى هو الصح وان المسلمين هم اللى اخرتهم الجنة ان شاء الله
مع ان ان دة ممكن يكون غير حقيقى بس بصراحة انا يمكن اكون اقتنعت شوية
وبكلام بابا فى بعض الاحيان اقنعنى بجد
ودلوقتى بعد كل دة اكتشفت ان دة كله مجرد خرافات واوهام فى دماغى مش اكتر
وان شاء الله ندخل الجنة ونتقابل كلنا باذن الله فيها
معلشى طولت على حضرتك شوية
سلام

kochia said...

ربنا يثبتك دايما ويثبتنا علي الدين ان شاء الله
امين

ريمان said...

اول مره اسمع الكلام ده

بس ده غلط كبير جدا منك انت تقرا كتب المستشرقين دول


لانهم بيشككوا فى العقيده بشكل مخيف


وعلى فكره ممكن كمان ايامها كان حصل عندك وسواس قهرى


بس الحمد لله انك خرجت من الحاله دى

منتظرين حكايه رحله العمره البوست الجاى انش اء الله

مدحت محمد said...

سلوى

ربنا يكرمك على الدعاء

بس انا مكنتش اقصد اقرا للمستشرقين الا بالصدفة البحتة واللى بيمشى على دربهم دلوقتى فى الهجوم على الاسلام القس زكريا بطرس
على قناة الحياة
فى القمر الاوروبى

مدحت محمد said...

dodoo
رضيت بالله ربا وبالاسلام دينا وبسيدنا محمد صلى الله عليه وسلم نبيا ورسولا

لا مفيش ذرة شك الحمد لله ابدا

تحياتى

مدحت محمد said...

تبنا الى الله ورجعنا الى الله وعزمنا عزما اكيداً على اننا لن نعود الى الذنوب والمعاصي ابدا وبرئنا من كل ذنب ومن كل دين يخالف دين الاسلام

تحياتى لحضرتك ويارب يكون اسلامنا صحيح وايماننا كامل

مدحت محمد said...

ياسمينا

لا ولا طولتى ولاحاجة

بس عادى ممكن اى حد يويويله الشيطان بشوية تخاريف كدة بس اهم حاجة يخرج بفايدة من الوسوسواس وميقعش فيها تانى

مدحت محمد said...

كوشيا

ربنا يتقبل منك يارب

شكرا للدعاء

مدحت محمد said...

ريمان

انا عمرى ماحكيت الموضوع ده لحد
وعمرى ماهحكيه
ولو انى عارف انى فى حد قريب منى
هيقراه مكنتش كتبته
لكن هنا بفضفض

اما موضوع المستشرقين مكانش بارادتى
لانى اقراه
الى جانب
انى كنت لسة صغير

بس

عالم حبيب said...

مع ختام رمضان وقدوم العيد .. أدعوا الله أن يتقبل منا ومنكم الشهر ويهل علينا وعليكم والمسملين هلال العيد بسعادة واطمئنان وثبات على الطاعات بعد رمضان

أذكركم بصيام 6 من شوال لحديث النبي صلى الله عليه وسلم : من صام رمضان وأتبعه بست من شوال خرج كيوم ولدته أمه .. صحيح مسلم

كل عام وأنتم الى الله أقرب وعلى طاعته أدوم

مدحت محمد said...

عالم حبيب

جزاك الله خير على التذكرة

عاشقة الأحزان said...

السلام عليكم ورحمة الله وبركاته

كل سنه وحضرتك طيب وبصحه سعيده وربنا يديم عليك نعمة الاسلام
وعيد فطر سعيد علينا وعلى الامة الاسلاميه جمعاء
وربنا يكرمك وسعدت قووى بمرورى هنا ويبقا التواصل

مودتىى
ايناس

ليس فقيرا من يحب said...

السلام عليكم

كل سنه وحضرتك طيب

عيد سعيد عليك وعلى الاسرة الكريمه يارب

yasmina said...

ايه دة ليه الغيبة الطويلة دى
ولا فى المدونة ولا فى الميل
لأ طمننا على حضرتك بقى
بلاش قلق
ويارب تكون بالف خير
وكل سنة وحضرتك طيب
وعيد سعيد

موناليزا said...

الحمدلله ان هدانا اليه
تعرف فى مرة عزمنا عندنا واحدة حديثة الاسلام كانت مسيحية واسلمت وشوفتها وقت الاذان بتعمل ايه وقد ايه حريصة على الصلاة فى اول الوقت كنت انا وقتها لسة فى اولى اعدادى وكنت لسه بعيدة اه بحب دينى وبعتز بيه بس ماكنتش ملتزمة
وقتها بجد قلت سبحان الله هى فعلا مسلمة لانها اقتنعت بالاسلام فحبته فنفذت تعاليم الله بدقة
الحمدلله ان هدانا اليه وجعلنا نشعر بنعمة الاسلام

ربنا يرحم والدك ويخليلك والدتك

مدحت محمد said...

عاشقة الاحزان

ميرسى للمرور

وكل سنة وحضرتك بخير

مدحت محمد said...

ليس فقيرا من يحب

كل سنة وحضرتك بخير

ميرسى المرور

مدحت محمد said...

ياسمينا

معلش الويندوز واقع

بس انا بخير الحمد لله

ربنا يخليكى على السؤال يا ياسمينا

مدحت محمد said...

موناليزا

ربنا يديم علينا نعمة الاسلام

فعلا اكترية اللى بيدخلو الاسلام

بيبقو عرفو الاسلام اكتر منا

عندك حق

وكل سنة وانتى طيبة